Class opening, posibleng sa Agosto — DepEd

Pinag-aaralan ng Department of Education (DepEd) na gawing sa Agosto na lamang ang pagbubukas ng klase para sa susunod na school year.

Ito ang inihayag ni DepEd Secretary Leonor Briones, dahil sa epekto ng Coronavirus Disease 2019.

Ayon kay Briones, sa ngayon ay hindi rin nila masabi pa kung sa una o huling linggo ng Agosto gagawin ang pagbubukas ng klase.

Ang pagbubukas ng klase sa mga pampublikong paaralan sa bansa ay nagsisimula ng Hunyo. Nakipag-ugnayan na aniya ang ahensiya sa mga opisyal at mga eksperto kaugnay sa pagbubukas ng school year.

Ayon sa batas, ang school year ay dapat umanong magsimula ng Hunyo hanggang Agosto.

Isa pa sa pinag-aaralan din umano ng DepEd ay ang pagkakaroon ng Saturday classes. Pero ito ay hindi aniya karaniwang sa silid-aralan kundi maaaring sa bahay, gaya ng pagbibigay ng assignment.