Lesson, idadaan sa TV at radyo — DepEd

Maaaring sa pamamagitan ng telebisyon o radyo pansamantalang makakuha ng kanilang mga aralin ang ilang estudyante sa bansa kung patuloy pa ring magkakaroon ng travel restriction sa ilang lugar sa bansa dahil sa Coronavirus Disease 2019.

Ipinaliwanag ni Education Undersecretary Nepomuceno Malaluan na tuloy pa rin ang pagbubukas ng school year 2020-2021.

Gayunman, hindi naman ito nangangahulugang kailangang pumasok sa eskuwelahan ang mga estudyante.

Paliwanag ni Malaluan, ang covid-19 ay isang global pandemic at hindi madaling matatapos.

Kaya naman sa mga lugar na hindi posible ang normal na classroom set up ay pinag-aaralan ng Department of Education ang ICT o Information and Communication Technology.

Inaasahang sa linggong ito ay iaanunsiyo aniya ng DepEd ang schedule ng pagbubukas ng school year na karaniwang nagsisimula ng Hunyo.

Nabatid na nagsagawa ng survey ang DepEd kaugnay sa teaching platform ng mga estudyante at eskuwelahan na kanilang ipiprisinta sa Inter-Agency Task Force on COVID.