Quarantine centers, may libreng WiFi — DICT

Naglagay na ng libreng WiFi hotspots ang Department of Information and Communications Technology (DICT) sa mga bagong talagang COVID-19 quarantine centers sa Kalakhang Maynila.

Mayroon nang free WiFi sa Rizal Memorial Coliseum sa Manila; Philippine International Convention Center (PICC) at World Trade Center Metro Manila sa Pasay City.

Nagkaloob na rin ang DICT ng free WiFi sa iba’t ibang lugar sa bansa, gaya sa Dagupan City Astrodome sa Pangasinan; New Clark City sa Capas, Tarlac; City Rest Drive Inn sa Tuguegarao City; Sacred Heart School for Boys sa Cebu City at Ateneo de Zamboanga – Lantaka Campus sa Zamboanga City.

Malaking tulong umano ang libreng internet connectivity sa mga health workers para sa kanilang pagsusumite ng situation reports via online.

Ganundin sa mga pasyente na sa pamamagitan nito ay kanilang makakausap ang kani-kanilang pamilya at mahal sa buhay kahit na nasa isolation.

Una nang naglagay ng free WiFi hotspots sa mahigit 30 COVID-19 monitoring and control centers, maging sa limang COVID-19 testing centers sa buong bansa.