Depressed dahil sa COVID-19 Kagawad nagbaril sa ulo, patay

Dahil umano sa depresyon, nagbaril sa sarili ang isang barangay kagawad kaugnay ng Coronavirus Disease 2019 (COVID-19) sa Tondo, Manila.

Namatay noon din ang 61-anyos na biktima na kagawad ng Bgy, 163, Zone 14, Tondo, sanhi ng tama ng bala sa ulo.

Batay sa imbestigasyon ni P/Master Sgt. Jansen Rey San Pedro kay Manila Police District-Homicide Section, alas-12:20 ng hatinggabi nang mangyari ang pagpapakamatay ng biktima.

Base sa closed circuit television (CCTV) footage, nakatayo ang biktima habang nag-iisa sa nasabing lugar nang biglang ikasa ang baril at itinutok sa ulo at kinalabit, pero hindi umano pumutok.

Ilang sandali pa, itinutok ulit ng biktima sa kanyang ulo ang baril at pumutok ito dahilan upang bumagsak siya nang duguan.

Sa nakuhang impormasyon sa mga kaanak nito, kalalabas pa lamang ng Metropolitan Medical Center ng biktima na na-confine dahil sa pneumonia at emphysema.

Sumailalim pa umano ito sa COVID-19 laboratory test at base sa ipinakitang resulta sa imbestigador mula sa cellphone picture ng kaanak, negatibo naman sa COVID-19 ang biktima.

“SARS-CoV-2 (causative agent of COVID-19) viral RNA not detected,” nakasaad sa resulta na inilabas ng Research Institute for Tropical Medicine.