Eleksiyon at rebelyon, iisang mithiin, magkaibigang paraan
Inaresto ang dating supremo ng CPP-NPA.
Ngayon lang siya natagpuan!
◘◘◘
NAGPIYANSA na ang mga kinasuhan ng sedisyon.
Ano ang sedisyon?
Ito ay ang pagtangkang pang-aagaw sa umiiral na gobyerno!
◘◘◘
ANO ang ibig sabihin ng pang-aagaw sa gobyerno?
Ano ang pagkakaiba nito sa pag-agaw sa puwesto gamit ang eleksiyon?
◘◘◘
BATAY sa Konstitusyon, ang normal na proseso sa pagpapalit ng liderato ay ang aktuwal na halalan.
At ito ay payapa at tahimik!
◘◘◘
SA eleksiyon, ang porma o estilo ng gobyerno ay mananatili pero ito ay nakapundasyon sa umiiral na Konstitusyon.
Sa sedisyon, tatangkain nitong palitan ang liderato sa sistemang labag o hindi ginagabayan ng Saligang-Batas.
Karaniwan itong madugo!
◘◘◘
ANG eleksiyon at rebelyon ay may parehong mithiin — pagpapalit ng lider.
Pero ang eleksiyon ay nakabatay sa Konstitusyon, samantalang, sa rebelyon — ang papalitan mismo ay ang Konstitusyon!
◘◘◘
ANG mga kandidato ay nangangako ng pagpapalit ng sistema para sa ikabubuti ng lahat.
Sa rebelyon o sedisyon, ang mga rebelde ay nangangako rin ng pagbabago at inihahayag din na pabor ito sa nakararami.
Pareho ang ikinakatwiran ng dalawang ideolohiya — sa ikabubuti ng lahat!
◘◘◘
SAKALING magwagi o magtagumpay ang mga rebelde na maagaw ang gobyerno — idedeklara nila ang mga “pinalayas” sa poder na “kalaban naman ng estado”.
Ibig sabihin, tipong nag-aagawan ang dalawang porma ng gobyerno — kung sino ang matalo — idedeklarang “labanan ng pamahalaan at kalaban ng nakararami”!
◘◘◘
MAHALAGANG maunawaan ng lahat kung paano na nagbabago ang gobyerno.
Mahirap masukat kung sino ang mali at sino ang tama — kapag pinag-uusapan ang “ikabubuti ng mayorya”!
◘◘◘
SA kabuuan, mahalagang magtakda ng Konstitusyon — dahil ito ang dapat umiral at ipinakikipaglaban ng bawat mamamayan.
Kapag ang mismong lider ay lumalabag sa Konstitusyon — kailangan siyang palitan.
Pero, sa demokratikong gobyerno, dapat dumaan siya sa maayos na proseso na itinatadhana mismo ng Konstitusyon!
Comments