Gilas, nabawasan ng 2 players para sa FIBA Cup

Nagsisimula pa lamang sa kanilang preparasyon ang Gilas Pilipinas para sa opening window ng FIBA Asia Cup Qualifiers pero nabawasan na sila agad ng dalawang players. Dalawang beteranong big men ang agad nabawas sa pool na nasa ilalim ng paggabay ni interim coach Mark Dickel.

Parehas nagpaalam sina Christian Standhardinger ng Northport at Japeth Aguilar ng Barangay Ginebra na hindi sila makakalaro para sa national team sa unang dalawang laro ng qualifier kontra Thailand at Indonesia ngayong Pebrero.

Parehong miyembro ng Gilas team na nagpanatili ng gold medal ng bansa sa nakaraang 30th Southeast Asian Games, nagsabi sina Standhardinger at Aguilar na hindi sila makakalaro sa first window ng Asian qualifier.

Ang PBA Governors’ Cup Best Player of the Conference na si Standhardinger ay dahil sa injury at ang nakaraang Governors Cup Finals MVP na si Aguilar ay mayroon namang personal na dahilan. “Japeth is out. He informed us that he’s going on a delayed honeymoon so he’s not available for the first window,” ayon kay Gilas program director Tab Baldwin. “Christian has gotten his (knee) issue and that’s very real and we understand that.

We don’t want to put any player in jeopardy because he’s rehabbing an injury and he’s on a specific timetable. We just have to accept that for this window and understand that,” dagdag nito.

Si Standhardinger na nagpunta sa unang araw ng ensayo ay may iniinda pa ring injury sa kaliwang tuhod na nagpahirap sa kanya sa nakaraang PBA 44th season.

Kulang ayon kay Standhardinger ang dalawang linggo upang makapagpalakas siya kaagad at matutunan ang sistema ni Dickel. “It’s just not possible. It’s a risk to get injured and the risk is very high,” wika ni Standhardinger na nangako namang magiging handa siya sa susunod na window sa Nobyembre. Bunga nito, dalawampu’t dalawa na lang ang mga manlalarong nasa Gilas pool.