Pinoy climber, bronze sa Asian Youth C’ships

Kasunod ng matagumpay na kampanya sa nagdaang Southeast Asian Games, nagpapatuloy pa rin ang mga Pinoy athletes sa paghakot ng medalya sa international sporting events.

Naka-tansong medalya si Philippine climber Gerald Verosil, 18, Asian Youth Championships 2019 sa Bengaluru, India nitong nagdaang weekend. Pangatlo siya sa Male Juniors Lead category, na kung saan dinomina ang event ng Japanese athletes na sina Sohta Amagasa at Yuta Imaizumi na pawang nagwagi ng gold at silver. Ikaapat din si Verosil sa Male Juniors Bouldering category.

Samantala, pumasok na ang 16-anyos na si Derille Pagayon sa finals ng Female Youth Lead at Bouldering categories, pero nabigong makasampa sa podium finish.

Ito ang unang pagkakataon na ang Philippine National Climbing Team ay nagpadala ng youth team sa isang international competition mula noong 2016. “We hope that their victory inspires many more youth climbers here in the Philippines to climb stronger. With Gerald and Derille leading the way of next generation climbers, the future looks bright,” ayon sa statement ng team.