Bosh, Garnett, Bryant at Duncan sa Hall of Fame

Nanguna ang mga alamat ng basketball na sina Kobe Bryant, Tim Duncan, Kevin Garnett at Chris Bosh sa Naismith Memorial Basketball Hall of Fame sa listahan ng mga nominado. Nakatipon ang apat ng 13 NBA titles, 4 NBA regular season MVP, 5 NBA finals MVP awards at 59 All-Star game na siyang nanguna sa 50 iba pa na nominado ng North American Committee para sa 2020.

Babanggitin ang mga finalists sa All-Star Weekend sa Chicago sa Pebrero 14-16 at ilalathala naman ang Final Four sa Abril mula sa Atlanta. “My career ended earlier than expected and that hurt immensely,” ayon dating Miami star na si Bosh. “To come to this point being nominated for the Hall of Fame with my heroes is truly an amazing feeling.” Bukod sa apat, humilera rin sina Shawn Marion, Buck Williams, Mark Eaton at Michael Finley.

Nominado rin sa coaches sina Rick Adelman, George Karl, Dick Motta at Rudy Tomjanovich.

Habang sa kababaihan ay kasama ang mga pangalan nina three-time WNBA champion Swin Cash at 2012 WNBA Finals MVP Tamika Catchings, at si San Antonio Spurs assistant coach Becky Hammon.