GF ni Andre, ipinakilala na raw sa kanya… Jomari, oks lang na binigyan ni Aiko ng condom ang anak

Julie Bonifacio / Winner!

If worse comes to worst, posibleng umabot sa legal ang usapin ni Para­ñaque City Councilor Jomari Ylla­na at ng ex-girlfriend niyang si Joy Reyes na nanay ng dalawa niyang anak.

Kung matatandaan, nag-rant kama­kailan sa social media si Joy at inaku­sahan si Jom na iniwan silang mag-iina at hindi sinusus­tentuhan.

“Kung kailangang i-settle ‘yung na-violate na agreement namin, kung kailangang i-update, i-amend at ‘di na kailangang ira-rant sa social media, kung hindi magkaka­sundo at magkakaayos… Wala naman ka­ming magagawa kung hindi ilagay sa tama, eh, through legal process,” pahayag ni Jo­mari sa mga sinabi ni Joy sa socmed.

Posibleng sa korte na ayusin ni Jomari ang problema nila ni Joy, bagama’t ami­nado si Jomari na parehong masakit ito para sa kanila ng ex-live-in partner.

“Mag-aano tayo, padadalhan siya ng formal letter. Titingnan natin ang sagot niya. Ganu’n naman, eh, para malinis.”

Nilinaw naman ni Jomari sa pakikipag-usap niya sa ilang members ng press na hindi ang problema nila ni Joy ang dahilan kaya ‘di siya kinakausap ng panganay na anak nila ni Aiko Melendez na si Andre.

“No, no, no. Absolutely, hindi naman ganu’n. Saka, hindi naman ako nagpakasal.”

Since nag-start daw ang school year ni Andre sa pinapasukang bagong eskuwelahan na Don Bosco, hindi pa raw sila nagkakausap.

“Nag-shift kasi siya ng course. I’ve been waiting, waiting for him na magkausap kaming mag-ama, magkaintindihan kami. We’re very, very close. May dinaramdam ‘yung anak ko sa akin. Eh, ako naman, nag-aantay lang. Pero ang huling usapan namin ni Andre, hihintayin ko siya. Kasi, meron kaming kailangang pag-usapan. ‘Yung pag-uusapan namin is very, very private, usa­pang-lalaki, at saka, usapang mag-ama.”

Kahit daw nu’ng nakaraang birthday ni Andre last September, hindi sinagot ng kanyang anak ang message niya.

“Every year, may pa-birthday kami na bonding. Although nu’ng September, nu’ng birthday niya, hindi kami nagka­usap. Pero binati ko siya, hindi siya suma­got,” may lungkot na sabi ni Jom.

May nagsabi kay Jom na baka busy lang si Andre kaya hindi siya nasasagot.

“No,” diin niya, “meron lang kaming kailangang pag-usapan. Medyo pribadong bagay. Eh, I HAVE TO MAKE A STAND SA PAGIGING TATAY NIYA. Uh, hindi ko alam kung nahihiya siya or natatakot. Pero nagri-reach out ako sa kanya. Hindi ako tumitigil sa pagri-reach out. Pero hindi siya su­masagot,” makahulugang lahad ni Jom.

Hindi naman dahil nag-shift ng course si Andre?

“Uh, gusto ko ‘yung nag-shift siya. Gusto ko ‘yung pinag-aaralan niya, ‘yung gusto niya. Ang binubutingting niya ngayon, mga makina. Automotive ang course niya sa Don Bosco. Nanggaling siya ng Marketing? Marketing Management.”

Sa tingin niya, paano sila magka­kaayos ni Andre?

“Nagri-reach out ako. Naniniwala ako, one way or the other, magkakatagpo rin kami. Magkakausap din kami. So, nandu’n siya sa sitwasyon na ayaw niya akong kausapin.”

Wish niya na magka­usap agad sila ni Andre.

“Oo, saka I’ve never been to this situation with Andre before. First time ‘to. Although alam ko, happy siya. May girlfriend siya ngayon.”

Clueless si Jom kung ano ang dahilan bakit ‘di siya nire-reply-an ni Andre.

“Ako mismo, gusto ko ring marinig sa kanya. Kahapon nga, nag-message ako sa kanya, dedma. Pero nabasa niya, sure ako. Seen zone, eh, hehe.”

Hindi kaya may kasa­la­nan siya kay Andre kaya sini-seen zone na lang ang message niya?

“Gusto kong isipin na sana, ako na ‘yung may ka­sa­lanan. ‘Yun ay kung pa­pipiliin ako. Although, hindi klaro, huh? Kasi, hindi kami nagkakausap. Pero kung papipiliin ako, mas gusto kong ako na ‘yung nagkamali, eh.”

Nabayaran ba niya ang tuition fee ni Andre?

“Yes, we paid for ‘yung enrollment niya sa Don Bosco. Kababayad ko lang, kasi nga nag-shift siya, eh.”

What about his allowance?

“Allowance ang hindi ko maibibigay kasi nag-cut siya ng communication sa akin, eh. I’ve paid for his enrollment for his course, hinihintay ko lang siya.”

Hindi kaya nakabuntis si Andre?

“Hindi…hindi. Hahaha!”

Pero hindi pa raw nami-meet ni Jom ang girlfriend ngayon ng anak.

“Pero nagkaroon siya ng girlfriend before. Siguro, mga two years din sila. Ipinakilala niya sa akin ‘yun. Tinanong ko nga siya bakit sila nag-break. Ma­gastos daw. Hahaha!!!”

Kung ilang buwan na siyang ‘di kina­kausap ni Andre, tatlong taon naman na hindi na sila on speaking terms ni Aiko.

“Nagkita kami sa airport noon, ka­sama niya ‘yung cast ng Wildflower ba ‘yun? Kahit kami, hindi on speaking terms ni Aiko, nu’ng nagkita kami sa airport, nagbatian kami. Kasi nag­pasalamat siya sa ibinigay kong kotse kay Andre.”

Ano’ng kotse ‘yun?

“‘Yung isang kotse ko na gustung-gusto niya. Ipinost ko sa Instagram, Toyota.”

Okey ba sa kanya na binigyan ni Aiko si Andre ng condom? For protection daw.

“With Andre naman, since 12 or 13 siya, we’re very open about sexual (matters). Kailangang pag-usapan, kaso adolescence. Nandoon naman ako kay Andre pagdating sa stage ng buhay niya na ‘yan.”

Oh, well, dasal na lang namin ay magkausap na sina Jom and Andre.