Speaker Cayetano, todo-banat kay VP Leni, durog ngayon sa netizens dahil sa P55 milyong kaldero sa S

Pablo L. Hernandez III / Prangkahan

NOON, SI VP LENI ANG BINABANATAN NI SPEAKER CAYETANO, NGAYON, SIYA NA ANG BINABANATAN NG PUBLIKO—Kamakailan, panay ang banat ni Speaker Alan Peter Cayetano kay VP Leni Robredo dahil mula raw nang italaga ito ni P-Duterte bilang co-chairman ng Inter-Agency Committee on Anti-Illegal Drugs (ICAD) ay pulos daldal daw ang ginawa nito sa publiko.

Pero ngayon, iba na ang sitwasyon kasi si Speaker Cayetano na ang binabanatan ng publiko dahil sa pinagawa nitong P55 milyong SEA Games cauldron (kaldero), na ayon kay Sen. Franklin Drilon ay overpriced daw, boom!

◘◘◘

PALUSOT NI SPEAKER CAYETANO, “WORK OF ART” DAW ANG P55 MILYONG KALDERO—Ayon kay Speaker Cayetano, huwag na raw batikusin ang ipinagawa niyang P55 milyong “kaldero” na gagamitin sa SEA Games dahil ito raw ay “work of art”.

‘Yan ang palusot ni Speaker Cayetano, pero para sa taumbayan, dahil isang beses lang ito gagamitin, hindi ito “work of art” kundi “art of corruption”, period!

◘◘◘

U.N. AT U.S., ‘ENEMIES OF THE STATE’ NA AYON KAY PANELO — Sabi ni Presidential Spokesman Salvador Panelo, hindi na raw itinalaga ni P-Duterte si VP Leni bilang miyembro ng kanyang gabinete kahit na co-chairman ito ng ICAD dahil hindi raw nagustuhan ng pangulo ang ginawang pakikipag-usap ng bise-presidente sa mga “enemies of the state” ng bansa tulad ng United Nations (UN) at United States (US).

Ganu’n? Aba, ngayon lang nalaman ng taumbayan na ‘enemy’ na pala ng Pilipinas ang U.N. at U.S., tsk-tsk-tsk!

◘◘◘

COL. DELA PEÑA, “NGANGA” SA RAKET NI “ARNOLD BIGOTE” SA TAYTAY, RIZAL—Namamayagpag na raw ngayon ang raket na “drop balls” at “color games” ni “Arnold Bigote” sa Taytay, Rizal.

Dapat kuwestiyunin ni Rizal PNP Director Col. Renato Balba ang tauhan niyang si Taytay police Chief Lt. Col. Christopher dela Peña kung bakit “nganga” lang ito sa raket ni “Arnold Bigote”, period!