Jessy, kaya 'di pinakakasalan... Luis, kumantang ayaw nang napipilitan lang
Ipinaliwanag ni Luis Manzano ang tunay na dahilan kung bakit hanggang ngayon ay ‘di pa siya nagpo-propose sa girlfriend niyang si Jessy Mendiola. Marami na kasi ang tila naiinip na magpakasal ang dalawa since ilang taon na rin naman ang kanilang relasyon.
Sa guesting nina Luis Manzano at Billy Crawford sa programa nina Jolina Magdangal, Karla Estrada at Melai Cantiveros na Magandang Buhay bilang bahagi ng kanilang promo para sa bago nilang reality-talent show format na Your Moment ay napag-usapan ang tungkol sa pag-aasawa ng panganay na anak ni Lipa Congresswoman Vilma Santos at ni Edu Manzano.
Mismong si Billy ang nagbato ng kuwestiyon kay Luis kung kailan magpapakasal ang kanyang kaibigan.
“Sana soon… sana talaga. Dahil ito nga si Billy Boy, nakita ko naman kung gaano rin ka-happy. At siyempre, kahit papaano, nakakainggit ‘yung nakikita mo ‘yung formality ng kanilang pagmamahalan. Pero siyempre, at the same time, ayokong madaliin, ayokong pilitin,” paliwanag ni Luis.
Ayaw daw niyang matulad sa ibang couples na ikinasal pero kalaunan ay naghiwalay.
“Marami tayong kilala na ikinasal, hindi nag-work out. ’Pag tinanong mo kung bakit, kasi ang sagot nila, hindi pa pala ‘yun ang tamang time—pinilit, na-pressure sila sa pamilya, sa society.”
Inayunan naman ni Billy ang sinabi ni Luis.
“‘Pag alam mo naman talaga… and you will do everything, tama si Lulu Boy, hindi puwedeng pilitin ang hindi pa tama sa oras,” sabi naman ni Billy.
Pinuri pa ni Billy si Luis dahil sa pagkakakilala niya sa kaibigan, eh, talagang pinaghahandaan ng anak ni Congw. Vi ang kanyang future at future family.
“Sobrang happy din ako para kay Lulu Boy kasi alam ko, malapit-lapit na ‘yan,” prediksiyon pa ni Billy.
Pero teka, baka naman nais pagbigyan ni Luis si Jessy na ma-enjoy muna ang career niya bago siya “itali” sa bahay kapag ikinasal na sila. At feeling namin, magandang break for Jessy kung iri-remake niya ang movie ni Congw. Vi nu’ng dekada ‘80, ang Burlesk Queen.
Sa Facebook Live na tsikahan nina Luis, Jessy at Congw. Vi, nabanggit ng Your Moment host na may mga nagsasabi na malaki ang pagkakahawig ng kanyang mommy at girlfriend. At nagkataon pa na pareho ng haircut ngayon sina Congw. Vi at Jessy kaya mas lumutang ang pagkakahawig nila.
Aliw na aliw naman ang Magandang Buhay hosts sa mga pahayag nina Luis at Billy sa kanilang programa.
Ang Magandang Buhay ay napapanood mula Lunes hanggang Biyernes pagkatapos ng Umagang Kay Ganda sa ABS-CBN.
Comments