Wim Mendoza, umaangat sa top spot ng pace grand finals

TINABLA ni Batumi World Chess Olympiad veteran WIM Shania Mae Mendoza ang kanyang laro kay WIM Jan Jodilyn Fronda upang manatili sa liderato matapos ang eight rounds sa 2019 National Women’s Championship-Grand Finals na ginaganap sa Philippine Academy for Chess Excellence (PACE) headquarters sa Mindanao Ave. Project 6, Quezon City.

Matapos gulatin ang lahat sa kanyang impresibong back-to-back na panalo laban kina Rizalyn Jasmine Tejada at WGM Janelle Mae Frayna sa 6th at 7th rounds, nakun­tento si Mendoza na hatiin ang puntos laban kay Fronda na tangan ang dehadong itim na piyesa para patuloy na manguna na may nalikom na 6 na puntos. Ang 21-anyos na player mula FEU ay may apat na panalo at apat na tabla sa 13-round tournament na itinataguyod ng National Chess Federation of the Philippines (NCFP), sa pamumuno ni President/Chairman Prospero “Butch” Pichay upang makapili ng mga pambato ng bansa sa World Chess Olympiad sa Aug. 1-15, 2020 sa Khanty-Mansiysk, Russia. Nasa 2nd hanggang 3rd places na may 5.5 puntos sina Fronda at dating solo leader WIM Kylen Joy Mordido, na tumabla din kay Frayna. Pinataob ni WIM Catherine Perena-Secopito si WCM Mira Mirano upang sumalo sa five-way tie para 4th hanggang 8th places kasama sina Frayna, Marie Antoinette San Diego, WIM Mikee Charlene Suede at WIM Bernadette Galas.

Wagi naman si WFM Allaney Jia Doroy lavan kay Natori Diaz para umakyat sa 9th place na may apat na puntos. Ipinahayag ni tournament director GM Jayson Gonzales na ang kampeon ay mag-uuwi ng tropeo at P25,000 top prize. Ang runner-up at third placer ay tatanggap ng P15,000 at P10,000, ayon sa pagkasunod. Supervising arbiter si Gene Poliarco.