Partido Komunista, sakit ng ulo ng ‘Pinas, ipagbawal!
MAHIGIT limang dekada na ang nakalilipas nang pinamunuan ni Jose Maria Sison (30 taon nang masarap ang buhay sa The Netherlands) ang Partido Komunista o kilala ring Communist Party of the Philippines at ang armadong grupo nitong New People’s Army (CPP-NPA).
Hindi man nagwagi noong1980s, napakalaking problema pa rin sila ng bansa.
Sa ilang mga lugar sa bansa, partikular sa mga probinsiya ay patuloy pa rin ang kanilang pananakot para mahikayat ang mga magsasaka sa kanilang “pekeng rebolusyon”.
Maraming magulang ang nadismaya at sumama ang loob nang malamang ang kanilang mga anak na hirap na hirap nilang pag-aralin sa mga unibersidad at kolehiyo ay naeengganyong sumali sa NPA o mamundok!
Ang masaklap, nakikitil ang buhay ng mga batang ito dahil napapalaban sila sa puwersa ng pamahalaan.
Kapag naging NPA sila, walang magagawa ang mga sundalo kundi ang kalabanin sila dahil kung hindi, ang mga sibilyan ang mapapatay.
Napakalinaw na kinakailangang isabatas ang pababawal ng Partido Komunista at gawing iligal ang pagiging miyembro nito na may karampatang parusang pagkakulong.
Walang masama kung ang organisasyon ay gustong magpalaganap ng ideya ng komunismo.
Ang mali ay kung ito ay tulad ng Partido Komunista na may ideya na mag-aklas para pabagsakin ang demokratikong sistema ng pamahalaan sa pamamagitan ng dahas.
Mayroon tayong dating batas, ang Anti-Subversion Law na naipasa noong Hunyo 1957 ni dating Pangulong Carlos P. Garcia sa pamamagitan ng Republic Act 1700 kung saan idineklarang iligal ang Communist Party of the Philippines, Hukbong Mapagpalaya ng Bayan at iba pang mga organisasyon.
Ang problema, si dating Pangulong Fidel V. Ramos na ayaw daw sa sakit ng ulo, pinili nitong bawiin o ibasura ang Anti-Subversion Law noong 1992, ilang buwan pa lang nang umupo siya bilang pangulo.
May mga nagsasabing ginawa ito ni ex-P-FVR dahil sa kahilingan ni dating Pangulong Cory Aquino na pinagkakautangan niya ng kanyang pagiging pangulo.
Malapit si ex-P-Cory sa mga komunista dahil sa tingin niya, tumulong ang mga ito sa pagpapabagsak kay dating Pangulong Ferdinand Marcos.
Isipin ninyo, nakulong at napan na si Joma Sison ni ex-P-Marcos, pinalaya pa siya kaya ‘yun, nakatakbo tuloy sa The Netherlands.
Malaking sagabal sa pag-unlad ng bayan ang gulo na patuloy na ginagawa ng mga komunista.
Kinakailangang gawin ni Pangulong Rodrigo Duterte ang kanyang sinumpaang-tungkulin, ang depensahan ang Republika ng Pilipinas.
Hawak niya ang Kongreso at malaki rin ang suporta sa kanya ng mamamayan.
Alam nating wala siyang pakialam sa pambabatikos basta tama ang kanyang ginagawa.
Mabuti na lang at nagkaroon tayo ng pangulong may tapang at kakayahan na labanan ang Partido Komunista.
Comments