FRIAS AT BALTAZAR, BUMIDA SA ABU DHABI CHESS FESTIVAL

NAKUHA ni Jaime Joshua Frias ang korona sa Open Bracket tangay ang halos walang dungis na rekord samantalang pumangalawa si Danny Baltazar sa Seniors Division nang magsara ang 26th edition ng Abu Dhabi International Chess Festival sa United Arab Emirates.

Makinang na walong panalo at isang draw ang ipinakita ni Frias, pang 44 lang sa pre-tournament seedlings dahil sa mababang rating na 1822, sa 9 na salang sa board kaya nakaipon siya ng 8.5 puntos at walang hirap na napagwagian ang bakbakan sa Open.

Tinuruan niya ng leksiyon sina Yahya Alhammadi Abdalla (UAE, round 1), Said Al Balushi (Oman, round 2), kapwa Pinoy na si Noli Delloro (round 3), Abdulrahman Masrahi (Saudi Arabia, round 4), Abdulaziz Ali (UAE, round 5), FIDE Master Thorsten Cmiel (Germany, round 6), WFM J. Saranya (India, round 7) at ang kababayang si Francis Erwin Dimarucut (round 8) bago nakipaghatian ng puntos sa topseed at International Master Ibrahim Sultan na pambato ng host UAE.

Si Indian pride Grover Sumit, ranked 33rd, ang nakakuha ng 2nd position sa kartadang 7.5 puntos samantalang si Sultan ang huling kasapi ng podium ng dibisyong nilahukan ng may 150 disipulo ng ahedres mula sa 33 bansa kabilang na ang USA, Canada, China, Bangladesh, Iraq, Iran, Azerbaijan, Armenia, Kuwait, Tunisia, Sri Lanka, Yemen, at France.

Samantala, bridesmaid honors ang nakuha ni Baltazar sa labanan ng Senior woodpushers dahil sa naiposteng 5 puntos. Si GM Elmar Magerramov ng Azerbaijan ang nagkampeon sa 7 yugtong sagupaan sa tulong ng naisumiteng 6 puntos.