LADY VOLCANOES, UUBRA KAYA SA ASIA RUGBY TROPHY?

BILANG paghahanda para sa parating na 30th Southeast Asian Games, sasabak ang Philippine Lady Volcanoes sa 2019 Asia Rugby Women’s Trophy Series ngayong Agosto 10 at 11 sa Jakarta, Indonesia.

Sisikapin ng mga Pinay na maiuwi ang gold matapos makuha ang pilak noong nakaraang edisyon ng taunang torneo.

Nakahanay sa Lady Volcanoes ang koponan ng Indonesia, Brunei, Chinese-Taipei at Guam sa Grupo A. Nasa Grupo B ang Laos, Qatar, Bangladesh at India.

Noong 2018 sa Brunei, nagwagi ang Pilipinas sa unang limang laro bago matalo sa Malaysia para sa gold, 7-10.

Sa elimination, winalis nila ang Uzbekistan (12-10), India (17-12), Pakistan (31-0) at Nepal (43-0) at binura ang Guam sa semis, 10-7.

Magpapadala ang Philippine Rugby Football Union ng team na kabilang ang mga beteranang sina Helena Indigne, Sylvia Tudoc at Aiumi Ono at mga galing ibayong-dagat na sina Patricia Duffy, Lily Smythe at Jacquiline Rodriguez. Magsisilbing coach sina Fetala’i ‘Fitz’ Taua’a at Chris Everingham.

“The 2019 SEA Games is our number one priority so these events are extremely important to ensure that we are on the right path,” wika ni Volcanoes general manager Jake Letts sa lingguhang Philippine Sportswriters Association (PSA) Forum sa Amelie Hotel Manila.

“It’s a great opportunity for our athletes and teams to showcase were they are currently before the SEA Games.”