MATIBAY NA PULSO NG RED LIONS AT CSB BLAZERS, MASUSUBUKAN

NABITIN man noong nakaraang linggo, susubukang bumangon ng mga koponan sa pagpapatuloy ng umaatikabong aksyon sa 95th National Collegiate Athletic Association (NCAA) sa FilOil Flying V Centre. Itataya ng defending champion San Beda University at ng bumabangis na College of Saint Benilde ang pareho nilang malinis na kartadang 4-0 kontra sa magkahiwalay na laro.

Matatandaang handa na ang Red Lions at Blazers na magtapatan noong Biyernes subalit, biglang nagpasya ang pamunuan ng NCAA na ipagpaliban ito dahil sa matinding ulan at pagbaha sa Kalakhang Maynila. Bubuksan ng CSB ang araw ng pagharap sa rumaragasang Colegio De San Juan De Letran na may limang sunud-sunod na panalo alas-12:00 p.m. at susundan agad ng San Beda at walang panalong Mapua University alas-2:00 p.m.

Aasahan muli ng Blazers ni Coach Tyrone Tang ang husay na laro nina Jimboy Pasturan, Clement Leutcheu at Yankie Haruna upang maibsan ang pansamantalang pagkawala ni Justin Gutang dahil sa pilay. Itatapat ng Knights ni Coach Bonnie Tan sina Jerrick Balanza, Edson Batiller, Larry Muyang, Jeo Ambohot at Renato Ular na malaki ang naiambag sa limang panalo.