PAGULAYAN, HALL OF FAMER NA SA U.S. BILLIARD CONGRESS

INILUKLOK na si Fili­pino-Canadian Alejandro “The Lion” Pagulayan sa Bil­liard Congress of Ame­rica (BCA) Hall of Fame upang maging pang-apat na produkto ng lahing kayu­mang­gi na mapabilang sa piling listahan ng mga disi­pulo ng pagtumbok.

Nakuha ng tubong Isa­bela na manunumbok na kilala rin sa tawag na “The Killer Pixie”, ang karanga­lan matapos daigin sa boto­han ang lady cue artist ng England na si Kelly Fisher.

Bago sa pagkakaluklok ng masayahing manlalaro, umakyat na sa prestihiyo­song talaan sina Efren “The Magician” Reyes (2003) at Francisco “Django” Busta­mante (2010) noong nakara­ang dekada. Si Jose “Amang” Parica ang sumunod sa ya­pak ng mga alamat mula sa Gitnang Luzon, limang taon na ang nakalilipas.

Unang nagpakilala sa mundo ng bilyar si Pagula­yan matapos na pumanga­lawa sa likod ni Ralf Souquet ng Germany sa 2002 US Open 9-Ball Championship.

Bridesmaid uli ang na­ging papel niya sa 2003 World Pool Championship nang tu­miklop sa tikas ng isa pang Aleman (Thorsten Hoh­mann). Taong 2004 nang hi­rangin siyang hari ng World 9-Ball Champion­ship dahil sa pag­gapi kay Pei Wei Chang ng Taiwan (17-13). Taong 2005 nang sa wa­kas ay makopo niya ang ko­rona ng US Open 9-Ball Cham­pionship.

Ang 41-anyos na Hall of Famer ay aktibo pa rin sa paglalaro at kasalukuyang nasa pang-apat na baytang ng 2019 AzBilliards Money­board.