CEU SCORPIONS, ABANGAN ANG CONTENDER SA D-LEAGUE

BUNGA ng kanilang kahanga-hangang ipinakita noong first conference, ang Centro Escolar University (CEU) ang itinalagang numero unong contender para sa darating na PBA D-League Foundation Cup.

Napili ang Scorpions bilang paborito sa torneo na nakatakdang simulan sa Hulyo 25 sa Paco Arena sa Manila, dahil na rin sa respetadong runner-up finish nila sa Cignal-Ateneo sa nakaraang season opening conference kahit pa mayroon lamang silang walong manlalaro sa kanilang roster.

Gayunman, mabilis ding ibinaba ni CEU assistant coach Gabby Velasco ang kanilang estado buhat sa pagiging paborito.

Ayon kay Velasco, ibang koponan ng CEU ang isasabak nila ngayong darating na second conference kumpara sa koponang nag-overachieved noong nakaraan.

“The seven or six players from last conference would still be there, but the rest, manggagaling sa training team namin, while the others are from our recent tryouts. So this is going to be a totally different team,” pahayag ni Velasco na kumatawan kay head coach Derrick Pumaren sa nakaraang Philippine Sportswriters Association (PSA) Forum sa Amelie Hotel-Manila noong Martes.

“We wanted to improve and raise the basketball program of CEU, that’s why we joined the D-League. So I don’t think it would be fair to look us at again with the same caliber and same strength that we have last conference,”dagdag nito.

Isa lamang ang CEU sa anim na school-based teams na sasabak sa torneo na tatagal hanggang Oktubre.

Ang iba pang mga school-based teams ay ang AMA Titans, TIP Engineers, BRT Sumisip Basilan-St. Clare, Nailtalk-St. Dominic Savio, at McDavid La Salle Araneta University.

Makakatunggali nila ang commercial squads na Marinerong Pilipino Skippers, iWalk Chargers, Italianos Homme Shoes, Hyperwash Laundromat Vipers, Sterishred Medical, Alberei Kings (Zamboanga), at Hazchem Inc. (VA)