AIR FORCE, KAMPEON SA BASEBALL LEAGUE

UMISKOR ang Philippine Air Force ng kabuuang pitong runs upang maigupo ang Thunderz All Star, 7-4 at makamit ang titulo ng 2019 Philippine Baseball League Open noong Linggo ng hapon sa Rizal Memorial Baseball Stadium.

Walang palitan ang beteranong national team pitcher na si Romeo Jasmin sa kanyang paghagis sa loob ng pitong innings kung saan nagbigay ang dating Adamson University standout ng siyam na hits na binawi naman niya sa pagpapako ng walong tao sa kanilang mga bases.

Nakalalamang sa iskor na 3-0 papasok ng third inning, rumatsada ang Air Force at umiskor pa ng apat na runs dahil sa mga errors ng shortstops ng Thunderz upang palobohin pa ang kalamangan sa 7-0.

Sa unang laro, iginupo ng Adamson Soaring Falcons ang kanilang UAAP rival National University Bulldogs, 4-2, para sa bronze medal. Namuno sina right fielder Patrick Espinosa at Lexter Carandang sa nasabing panalo ng Falcons na inaasahang makakatulong ng malaki ang kanilang naging kampanya sa PBL sa darating na UAAP Season. (VA)