ELITE, NASA TOP SPOT NA; PARKS, MAINIT ANG LARO

SOLO ng Blackwater Elite ang top spot ng team standings matapos nilang lunurin ang NLEX Road Warriors, 132-106 kagabi sa 2019 PBA Commissioner’s Cup sa Ynares Center, Antipolo City.

Kumana si rookie Bobby Ray Parks Jr. ng 29 points habang nagtala si import Alexander Stephenson ng 21 markers at 17 rebounds para sa Elite na may 5-1 karta.

Maagang uminit ang opensa ng Elite, hinawakan nila ang 10-point lead, 63-53 sa halftime.

Hindi nagpabaya ang Blackwater sa third quarter kaya naman umabot pa sa 13 ang kanilang bentahe, 93-80 papasok ng fourth quarter.

Samantala, mag-uunahan sa tatlong sunod na panalo ang Alaska Aces at Meralco Bolts sa paghaharap nila ngayong alas-4:30 ng hapon sa parehong lugar.

Parehong tangan ang tig 3-2 records, lalapit sa tuktok ng liderato ang mananalo sa pagitan ng Aces at Bolts.

Aminado si Meralco head coach Norman Black na mapapalaban sila sa Aces dahil sa ipinakitang laro ng Alaska sa kanilang huling laro.

“It will be a tough matchup with Alaska,” saad ni Black “They looked very good in their last victory versus Magnolia, our interior defense versus (Alaska import Chris) Daniels will be important. We also must limit our turnovers versus their fullcourt press.”

Muling kakapitan ng Bolts si import Gani Lawal na nagtala ng 28 points at 26 rebounds sa panalo nila kontra Phoenix Fuel Masters, 101-95 noong Biyernes. Ibabangga naman ng Aces si reinforcement Robert Daniels na naging pangunahing armas nila ng makalaban ang Magnolia.

Magtatapat naman sa pangalawang laro ang Rain or Shine at Phoenix sa alas-6:45 ng gabi. (ATD)

Mga laro ngayon: (Ynares Center - Antipolo) 4:30 p.m. - Alaska vs Meralco 6:45 p.m. - Phoenix vs Rain or Shine