IDEAL 30 TEAMS, SAKTO NA SA NEXT MPBL SEASON

EKSAKTO nang 30 team ang kalahok sa Maharlika Pilipinas Basketball League (MPBL) dahil dalawa pang team ang lumagda at nakumpleto na ang sapat na bilang ng mga kalahok sa pinakamabilis na lumagong basketball league sa bansa.

Makaraang lumagda ang Sarangani noong Miyerkules, ang Iloilo naman at Nueva Ecija ang ika-apat at ika-5 expansion squads na lumahok ngayong season at pormal silang tinanggap ng MPBL officials sa pamumuno ni founder at chief executive officer Manny Pacquiao at league commissioner Kenneth Duremdes sa contract signing sa Makati Shangri-La Hotel.

Kinatawan ang Iloilo ni team owner JJ Javelosa, kasama ang anak na si dating Navotas Clutch Jay Javelosa at head coach Eric Gonzales. Tatawagin ang team na Iloilo United katulad ng sa Bicol na The Volcanoes.

Bagong team din ang Mindoro kung saan lalaro roon si Christian Singson na lumipat mula Mandaluyong at bagong Nueva Ecija. Habang may 5 bagong team sa liga na sisimulan sa Hunyo 12 ang season, hindi pa desidido ang Mandaluyong na lumahok sa MPBL. Ayon kay Commissioner Duremdes, bagamat hindi makalalaro ang Mandaluyong, pag-aari pa rin ang prangkisa ng MPBL.

Lahat ng teams na idinagdag ngayong season ay mula sa south at may pagbabagong gagawin dito si operations head Zaldy Realubit sa pag-bracket ng northern at southern. Iminungkahi niya na ang Marikina, Rizal at Parañaque ay maidagdag sa northern division.