‘WARRIOR’ LEE, ONE LIGHTWEIGHT WORLD CHAMP SA ENTER THE DRAGON

HINDI na naman makalilimutang aksyon ang natunghayan sa nakaraang exciting night ng martial arts na idinaos sa Singapore Indoor Stadium.

Itinampok ng ONE: Enter The Dragon sa main event ang laban ni Christian “The Warrior” Lee ng Singapore nang masungkit nito ang ONE Lightweight World Championship nang gibain sa technical knockout victory si Shinya “Tobikan Judan” Aoki ng Japan at maging pinakabatang male mixed martial arts World Champion sa kasaysayan.

Kinoronahan sa co-main event si Regian “The Immortal” Eersel ng The Netherlands para sa inaugural ONE Lightweight Kickboxing World Championship sa bisa ng unanimous decision victory laban sa kababayang si Nieky “The Natural” Holzken. Dumagundong ang arena nang ang kanilang Hometown hero na si Lee ay ginitla sa technical knockout victory si Aoki at maging ONE lightweight world champion.

Nagpakitang-gilas agad si Aoki sa opening round, pinababagsak si Lee at binibigyan ng armbar submission attempt pero nakakalag ang hometown favorite. Pagdating ng 2nd round, si Lee naman ang nagpaulan ng nakatutulig na upak at dito napabagsak si Aoki.

Nanaig naman Eersel kay Holzken nang magwagi sa unanimous decision at kunin ang inaugural ONE Lightweight Kickboxing World Championship. Palitan ng nakaka-excite na upakan sina Eersel at Holzken para sa 5-round bout. Pero mas malupit si Eersel sa jabs at panunuhod sa huling bahagi ng bakbakan. Sa lakas niya, siya ang nanaig sa scorecards ng 3 judges.

Nadagdagan muli ang win resume ni Muay Thai superstar Petchmorakot Petchyindee Academy ng Thailand nang magwagi sa split decision kontra kickboxing icon Giorgio “The Doctor” Petrosyan ng Italy para umabanse sa ONE Featherweight Kickboxing World Grand Prix Semi-finals.

Unang nakontrol ni Petrosyan ang opening round, sa bisa ng kanyang boxing skills. Pero gumanti sa 2nd round si Petchmorakot, sinabayan din nito ang mga upak ng kalaban. Matapos ang makapigil-hiningang 3 round fight, si Petchmorakot ang nagwagi sa gahiblang desisyon.

Abanse naman si Samy “AK47” Sana ng France sa semifinals ng ONE Featherweight Kickboxing World Grand Prix matapos umiskor ng unanimous decision win kontra “The Boxing Computer” Yodsanklai IWE Fairtex ng Thailand. (MC)