UNAHAN NA SA PLAYOFFS ANG 4 TEAM NG PBA D-LEAGUE

DIKITAN ang nangungunang koponan sa Aspirants Group Cignal-Ateneo ang tatangkain ng University of Santo Tomas para sa target na playoff bonus sa tampok na laro ngayong hapon ng nakatakdang triple header sa 2019 PBA D-League sa JCSGO Gym sa Cubao.

Nasa ikalawang puwesto ngayon ang Tigers sa kanilang grupo hawak ang 5-1, panalo-talong marka kasunod ng Blue Eagles na may 8-1 na baraha.

Aasintahin ng UST ang ika-6 nilang panalo sa pagtutuos nila ng Che’Lu Bar and Grill sa ikatlong laban ganap na ika-4:00 ng hapon.

Tatangkain ng Tigers na patibayin ang kapit sa ikalawang posisyon para sa hinahabol nilang nalalabing insentibo papasok ng playoff round para sa kanilang grupo. Target ng UST ang back-to-back win pagkaraang makabalik sa winners circle matapos gapiin ang McDavid, 111-90, sa nakaraan nilang laban kasunod ng una nilang kabiguan sa kamay ng Petron-Letran.

Sa kampo naman ng Revellers, magsisikap silang makabalik sa winning track matapos ang nakaraang pagkatalo sa kamay ng Cignal-Ateneo na nagbaba sa kanila sa patas na 3-3, panalo-talong marka.

Magtatangka silang tumabla sa pumapanglimang Go for Gold-CSB upang makalapit sa 4th spot na kasa­lukuyang okupado ng Petron-Letran (5-3) para patuloy na palakasin ang tsansang makasama sa top 4 ng kanilang grupo.

Magtutuos sa unang laro ganap na ika-12:00 ng tanghali ang Wangs Basketball (3-4) at SMDC-NU (2-5) na parehong nasa lower half ng Foundation Group na susundan ng salpukan ng winless pa ring CD14 Designs-Trinity University (0-7) at University of Perpetual (1-5) ganap na 2:00 ng hapon. (VA)

Mga Laro Ngayon

JCSGO Gym, Cubao: 12 p.m.

Wangs Basketball vs SMDC-NU: 2 p.m.

CD14 Designs-Trinity vs Perpetual: 4 p.m.

UST vs Che’Lu Bar and Grill