Pagmumura hindi krimen, pero masamang makaugalian!
“HINDI krimen ang pagmumura”, ito ang sinabi ni Pangulong Rodrigo Duterte sa kanyang talumpati na naganap sa PICC sa Pasay City, kamakalawa.
Aniya, mismong Korte Suprema na ang nagsabi na hindi slanderous ang pagmumura.
Sa totoo lang, hindi naman talaga masasabing krimen ang pagmumura, lalo na kung ginagamit lang ito bilang ekspresyon ng tao.
Gayunman, bagama’t, hindi ito masama para sa iba, kailangan pa rin itong ilagay sa lugar, partikular ng mga taong tinatawag na “public figure” dahil marami silang maaaring maimpluwensiyahan.
Sa ngayon, wala nang pinipiling edad ang pagmumura dahil mapabata o matanda man ay kaya itong gawin, ‘yun nga lang kahit sino ang makaririnig nito, paniguradong hindi ito magugustuhan dahil para sa ating moral at Simbahang-Katolika ay hindi ito maganda at kaaya-aya.
Dagdag pa rito, kahit na hindi slanderous ang pagmumura, hindi ito sapat na dahilan para ipagpatuloy ang ganitong nakaugalian, lalo na at wala namang magandang naitutulong para sa bayan.
Samantala, kahit pa sinabi ng pangulo na ito ay normal ng lengguwahe ng mga mayor sa mga taga-Mindanao region, ngayong pangulo na siya, dapat limitahan na niya ito hindi para makapagpakitang-tao kundi para magpakita ng respeto at masimulan na ang tunay na pagbabago.
‘Ika nga nila, bago natin mabago ang ating nasasakupan, baguhin muna natin ang ating hindi magagandang nakaugalian.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments