BLUE EAGLES, GINURLISAN NG UP ANG LIDERATO SA UAAP FOOTBALL

NAGTABLA sa 1-1 ang Katipunan-based squads, Ateneo de Manila at defen­ding champion University of the Philippines, sa ka­ni­lang tapatan na naging da­hilan ng pagkalaglag ng Blue Eagles sa liderato ng UAAP Season 81 men’s football tournament noong Linggo ng hapon sa FEU-Diliman pitch.

Naunang naka-goal ang Fighting Maroons sa pama­magitan ni King Miyagi sa fifth minute ng laro bago na­katabla ang Blue Eagles matapos ang goal ni Rupert Baña sa tulong ni Mark Na­cional pagkalipas ng apat na minuto. Naging mas ma­higpit ang depensa ng mag­kabilang panig na naging dahilan kaya wala ng naka-goal hanggang sa matapos ang laban.

Sa iba pang laro, muling kinabig ng Far Eastern Uni­versity ang liderato sa bisa ng 1-0 panalo kontra Uni­versity of the East.

Itinala ni Jermi Darapan ang solong goal ng laro sa 79th minute na por­mal na naghatid sa Tamaraws sa Fi­nal Four round.

Nasorpresa naman ng out-of-contention ng Adam­son ang University of Santo Tomas, 1-0, kaya nadiskaril ang pag-usad ng huli sa semis.

Bunga ng panalo, mu­ling naluklok ang Tamaraws sa liderato sa natipon nilang 24 puntos habang bumaba ang Blue Eagles sa second spot sa nalikom nilang 23 puntos.

Umangat ang UP sa ikat­long puwesto makaraang makaipon ng 20 puntos. Si Rey Poncardas ang nagpos­te ng goal sa 64th minute para sa Falcons.

Nalaglag ang Growling Tigers sa ika­limang puwesto kahit nana­tiling may 17 pun­tos, dala­wang puntos ang layo sa pu­mapang-apat na De La Salle na may 19 pun­tos.

Laglag na sa kontensi­yon ang UE na may 8 puntos kasama ng Adamson Uni­versity (11) at National Uni­versity (10). (VA)