Mga bibiyahe ngayong Semana Santa, magbaon ng maraming pasensiya

MAGBAON ng maraming pasensiya.

Ito ang payo sa mga motoristang bibiyahe ngayong nalalapit na Semana Santa.

Tulad sa mga daraan sa North Luzon Expressway (NLEX) at Manila-Cavite Expressway (Cavitex).

Batay sa pagtataya, asahan na umano ang 15 porsiyentong dagdag sa rami ng mga sasakyang daraan dito.

Noong 2018, umabot na umano sa 330,000 sasakyan kada araw ang nairehistro ng NLEX sa kasagsagan ng Holy Week, mas mataas kumpara sa 250,000 sasakyan kapag ordinaryong araw.

Samantala, maaari umanong pumalo sa 20 porsiyento ang dagdag na bibiyahe sa Cavitex.

Nangangahulugan ito na posibleng umakyat sa 170,000 hanggang 175,000 sasakyan ang maitatala simula sa Miyerkules Santo.

Mas mataas kumpara sa 150,000 hanggang 160,000 na pangkaraniwang bilang ng mga sasakyang bumibiyahe.

Gayunman, hindi lang para sa mga mag-e-NLEX o Cavitex ang paalala kundi sa lahat.

Kasabay ng mainit na panahon, hindi rin maiwasan ang mabilis na pag-init ng ulo.

Kaya bago umalis ng bahay, i-relax ang sarili at mag-isip ng mga paraan kung paano masasabayan ang trapik nang hindi maba-badtrip.