Habang papunta sa taping… JANINE NAAKSIDENTE, SASAKYAN WARAK!
Anj Cabilla / PAK ANG GANAP!
NASANGKOT sa minor accident ang Kapuso actress na si Janine Gutierrez kung saan nabangga ng fire truck ang sinasakyan niyang Dodge Durango na minamaneho ng kanyang driver.
Napag-alaman na naganap ito sa bandang Ortigas Avenue mag-a-alas-dos nang umaga noong April 1 habang papunta ang aktres sa taping ng kanyang GMA fantaseryeng Dragon Lady na kanyang pinagbibidahan.
Nasira ang bumper, tire rod, at ilan pang parts ng unahang bahagi ng sasakyan ni Janine kaya kinailangan itong i-tow at dalhin sa talyer dahil hindi na ito kayang imaneho pa.
Gayunman, hindi nasaktan o nagalusan man lang ang aktres (na nakaupo sa bandang likod ng sasakyan) at pati na rin ang kanyang driver. Wala ring nasaktan sa mga bumbero na sakay ng fire truck.
Nahingan naman ng pahayag ng PEP.ph ang aktres at sinabi niyang naalog lang ang kanilang sasakyan.
Aniya, “Hindi naman, medyo ano lang, naalog.”
Sa kabila ng takot sa kinasangkutang aksidente, dumiretso pa rin ang aktres at tumuloy sa taping ng kanyang serye.
Comments