Sundalo sugatan sa ambush

SAMAR—Isang sundalo ng Philippine Army (PA) ang sugatan sa isinagawang ambush ng mga rebel­deng New People’s Army (NPA), kamakalawa sa Bgy. Can-aponte, San Juan de Buan sa lalawigang ito.

Kinilala ang biktima na si Pvt. Ronald Alutang, Jr., nakatalaga sa 87th Infantry Battalion ng PA na nakabase sa nasabing lalawigan.

Ayon sa ulat, nagsasagawa ng community support program ang mga sundalo nang pagbabarilin sila ng mga NPA at dito tinamaan si Alutang na ngayon ay nagpapagamot na sa ospital.

Patuloy pa ang isinasagawang pagtugis ng tropa ng pamahalaan sa mga rebeldeng tumakas matapos tambangan ang grupo ni Alutang.