China, tumangging ‘pinalubog’ ang fishing boat | VIETNAM, MAG-IIMBESTIGA PA RIN

UMAPELA ng paglilinaw ang Vietnam kung paano lumubog ang isang fishing boat sa bahagi ng West Philippine Sea.

Ito’y ilang araw matapos sabihin ng local agency na binangga ng Chinese vessel ang nasabing bangka.

Miyerkules ng nakaraang linggo nang lumubog ang bangka malapit sa Da Loi Island sa Paracel Archipelago.

Gayunman, nailigtas ang limang mangingisdang sakay nito at ng isa pang bangkang-pangisda mula sa Vietnam.

Base sa pagsisiyasat ng national search and rescue agency ng Vietnam, binangga at pinalubog ng Chinese ves­sel ang naturang bangka, ngunit, hindi binanggit kung ito ay civilian o military.

Samantala, depensa ng Chinese Foreign Ministry, lumubog na umano ang barko nang lumapit ang Chinese vessel na siya ring nagligtas sa mga sakay nitong mangi­ngisda.

Matatandaang, inaangkin ng China ang 90 porsiyento ng West Philippine Sea na dahan-dahang nagpapalawig na kanilang military at iba pang installations sa mga artificial island at reef.