Malinaw ayon sa birthday... BEBOT NA NAKATAKDANG MATUPAD ANG MGA PANGARAP

Maestro Honorio Ong

Dear Maestro ,

Kasalukuyan akong nag-a-apply sa abroad bi­lang Domestic Helper. Ita­tanong ko kung ano ang ma­giging kapalaran ko sa ibang bansa? Sa love life naman, sa ngayon ay may boyfriend ako o kinakasama, pero hin­di pa kami kasal. May 14, 1984 ang birthday niya at may dalawa na kaming anak habang September 10, 1988 naman ang birthday ko.

Itatanong ko kung magtatagal kaya ang aming pagsasama kahit hindi pa kami kasal at siya na kaya ang lalaking makakasama ko, habambuhay? Uunlad kaya ako sa pag-a-abroad at maiaahon ko kaya sa ka­hirapan ang aking mga ma­gu­lang at makabibili ng sa­riling lupa at bahay kung sakaling makaiipon na ako habang nagtatrabaho sa abroad?

Umaasa,

Loida ng Dinahican, Infanta, Quezon

Dear Loida,

Ang birth date mong 10 o 1 (ang 10 ay 1+0=1) sa des­tiny number na 9 (9+ 10+1988=2007/ 20+07=27/ 2+7=9) sa zo­diac sign na Vir­go ang nagsasabing, makapag-a-abroad ka kung saan ang nasabing pangingibang-bansa ay lubhang magiging produk­tibo at masagana. Kaya lang, ang destiny number mong 9 sa birth date na 1 ay nagba­bala rin na hindi ka makaiiwas sa lalaking Leo na may pananagutan na sa buhay.

Ibig sabihin, sa susunod mong pangingibang-bansa, posibleng makakilala ka ng lalaking Leo at sa sandaling hindi mo siya nagawang la­yu­an o iwasan, tiyak ang ma­gaganap, kahit may ka-live-in ka na sa kasalukuyan o may kinakasama, mapapalautan ka sa nasabing lalaki sa pag-aakala mong tapat ang pag-ibig na iuukol niya sa iyo.

Sa bandang huli, tulad ng nasabi na, ipahahamak ka ng nasabing lalaking Leo dahil posibleng mabuntis ka niya sa ibang bansa upang minsan pa ay mawalan ka ng magan­dang career o hanapbuhay hang­gang sa tuluyang mapa­uwi ka sa ating bansa at dito mo na rin palalakihin sa lihim na lugar ang magiging bunga ng inyong pagmamahalan.

Ang buong akala mo ay pananagutan ka ng lalaking Leo na ito, anuman ang mang­yayari at sa inyong relas­yon, ngunit, sa bandang huli, hindi rin kayo magkakatuluyan upang minsan pa ay muli ka namang tanggapin ng ka-live-in mo na isinilang sa sign na Taurus na may birth date na 5.

Sa ikatlong pagkakataon, muli kang makapag-a-abroad at mahuhulog sa tukso ng mga lalaki, pero, kung iiwa­san mo ito, magtatagumpay ka na sa nasabing mga pa­ngingibang-bansa. Ngunit, kung mahuhumaling ka na naman sa nasabing mga man­lolokong lalaki na palaging magiging bahagi ng buhay mo higit lalo silang mga isinilang sa zodiac signs na Leo at Sa­gittarius tulad ng naipaliwa­nag na, kusang papangit ang maganda mo sanang career at pangarap na umunlad sa pangingibang- bansa.

Kaya nga, Loida, sa sanda­ling natuloy ka sa abroad, wala kang dapat gawin kundi iwasan ang kalalakihang isi­nilang sa zodiac signs na Leo at Sagittarius, isama na rin natin ang Aries higit lalo kung ikaw ay may mga nunal sa iyong dibdib kung saan ito ay malinaw na senyales na ang magiging “down fall” mo ay ang mga hangal na paki­kipagrelasyon sa nabanggit na mga kalalakihan.

Ngunit, kung sa simula pa lamang ng iyong pangingi­bang-bansa ay naiwasan mo na ang mga tukso ng hangal na mga pakikipagrelasyon sa mga hindi karapat-dapat na lalaki, tulad ng nabanggit na, marami pang pangingibang-bansa ang naghi­hintay sa iyong kapalaran na siguradong aani ng mga kasa­ganahan at mga pagpapala sa iyong buhay. Ayon sa iyong Travel Ca­lendar, ang mga pangingi­bang-bansang nabanggit ay ina­asahang magaganap at tuluy-tuloy na ngang itatala sa iyong karanasan ngayong 2019, sa edad mong 28 pataas.