MAGGIGITGITAN SA 19 NA SPORTS ANG MGA EDAD 15 PABABA SA DAVAO

HABANG ang national athletes ay abala sa kanilang paghahanda sa 2019 Southeast Asian Games, sasamantalahing kunin ng mga batang atletang may edad 15 pababa ang magpaligsahan sa 19 sports sa three legs ng Batang Pinoy umpisa ngayong Peb. 2-9 sa Davao del Norte Sports and Cultural Center sa Tagum City.

Mahigit 3,000 atletang mula sa iba’t-ibang lalawigan sa Mindanao ang magpapaligsahan sa hangad na maging kinatawan ng ‘Pinas sa international sports competitions tulad ng SEA Games, Asian Games at Olympic Games.

Ang mga sport na paglalabanan ay archery, arnis, athletics, badminton, baseball, basketball, boxing, chess, dance sport, karatedo, lawn tennis, pencak silat, sepak takraw, softball, swimming, table tennis, taekwondo, volleyball (indoor/ beach volleyball) at futsal.

Isinama ang futsal upang bigyan ang mga atleta ng tsansang maipakita ang galing sa laro na ito. Ang athletics, ang pinakatampok sa Batang Pinoy na tampok sa weeklong event, ay may 46 events na pangangasiwaan ng PATAFA. Sampu ang sports na hindi lalaruin sa tatlong legs at paglalabanan sa finals sa Bohol dahil kulang sa kalahok at walang sports facilities. Ito ay ang cycling, rugby football, gymnastics, judo, muay thai, triathlon, weightlifting, wrestling, wushu at soft tennis.

Ang Visayas leg ay idaraos sa Peb. 23-Mar. 2 sa Iloilo Sports Complex at ang Luzon leg sa Ilagan (Isabela) sa Marso 16-23. Ang Batang Pinoy ay ginagawa sa last quarter ng taon at inagahan dahil sa SEAG na lalaruin sa Nobyembre sa New Clark City Sports Complex. “We scheduled Batang Pinoy in the first quarter because of the SEA Games,” sabi ni Chairman William Ramirez.