Ibang sasakyan, bawal | LANE PARA LANG SA MGA MOTOR SA EDSA

TARGET ng Metropo­litan Manila Development Authority ang paglalagay ng eksklusibong motorcycle lanes sa EDSA oras na matu­loy ang panukalang road diet.

Sa ilalim ng road diet pro­posal, babawasan ang lapad ng mga lane sa EDSA ng hanggang tatlong metro para magkaroon ng bagong lane para sa mga motor­siklo.

Sa ngayon, may lima hang­gang anim na lanes ang EDSA na may average na 3.5 hanggang 3.7 metrong lapad kada lane.

“Kahit pa liitan natin ang daan, ligtas pa rin ito sa mga motorista,” ani MMDA General Manager Jojo Garcia matapos ang Metro Manila Council meeting.

Aniya, ikinokonsidera ng ahensiya na gawing ex­clu­sive motorcycle lane ang bagong lane, katabi ng yellow lanes na para naman sa pub­lic utility buses.

Ang existing motorcycle lane o blue lane sa EDSA ay hindi eksklusibo para sa mga rider at maaaring ga­mitin ng mga pribadong sasakyan.

Sa MMC meeting, inap­ru­bahan ng mga alkalde ng Metro Manila ang resolus­yon para pag-aralan ang planong road diet.

Inatasan ang MMDA na magsagawa ng traffic eva­luation studies para mala­man ang tamang bilis para sa pa­nukalang 3.05 metrong lanes.

Base sa pag-aaral ng De­partment of Public Works and Highways, maaaring pa­liitin ang lanes sa 3.05 metro.

Sa ilalim ng plano, mag­kakaroon ng segregation sa EDSA: Dalawang lanes na eks­k­lusibo sa mga pampa­saherong bus, isang lane sa mga motorsiklo at tatlo para sa mga pribadong sasakyan.

Ikinokonsidera rin para sa bagong lane ang mas ma­lawak na sidewalk, pedes­trian islands, crossways, bike lanes at green space.