Pinoy workers, wanted sa UAE, saudi at germany

LIBU-LIBONG trabaho ang naghihintay sa manggagawang Pilipino sa United Arab Emirates, Saudi Arabia at Germany.

Ayon sa Philippine Overseas Employment Administration (POEA), 1,000 babaeng specialist nurses ang kailangan ng Ministry of Health ng Saudi Arabia.

Para maging kuwalipikado, kailangan ang aplikante ay graduate ng Bachelor of Nursing, may Professional Regulations Commission (PRC) Board License at 2 taong karanasan sa trabaho.

Gayunman, hanggang Pebrero 1 puwedeng magsumite ng mga aplikasyon at dokumento ang mga aplikante sa POEA Central Office.

Samantala, naghahanap ng 150 emergency medical technicians (EMTs) ang National Ambulance Company sa Abu Dhabi kung saan ang mga aplikante ay dapat graduate ng Bachelor of Nursing, nakakumpleto ng internationally recognized EMT-Basic course at 8 buwang karanasan bilang EMT gayundin, ang deadline ng pagsumite ng aplikasyon ay hanggang Enero 31, ayon sa POEA.

Kailangan naman ng German Federal Employment Agency ng 400 nurses kung saan hanggang Pebrero 28 ang deadline ng aplikasyon.