BIADO, ‘DI PAAWAT, LAST 16 NA SA WORLD 9-BALL CHAMPIONSHIPS

TULOY ang kampanya ni Carlo Biado ng Pilipinas na mapanatili ang kanyang korona matapos siyang makapasok sa grupo ng huling labing-anim na manla­laro sa umuusok na bakbakan ng 2018 World 9-Ball Championships sa loob ng Al Arabi Sports Club ng Doha, Qatar.

Natakasan ni Biado ang upset-axe sa round of 32 na duwelo kontra kay Konrad Juszczyszyn ng Poland, 11-7, pati na rin sa pakikipagharap niya sa pambato ng Ukraine na si Vitaliy Patsura, 11-9, sa paligsahang puma­sok na sa knockout stages at naglalaan ng kabuuang halagang $200,000 para sa mga makapapasok sa winners’ circle.

Nauna rito, sumikad sa preliminary stage si Biado, pangatlo sa World Pool Billiards Association (WPA) rankings, sa pamamagitan ng pagdaig kina Argentinian Jorge Llanos, 9-3, at Sergey Lutsker ng Russia, 9-5.

Bukod kay Biado, tersera sa katatapos na All-Japan Billiards at sa Sen. Emmanuel Pacquiao 40th Birthday 10-Ball tilt, wala nang iba pang Pinoy ang nakapasok sa final 16. Nalaglag sa last 64 sina Alex Pagulayan morning at Jef­frey Ignacio habang tiklop sa last 32 sina Roland Garcia at Johann Gonzales Chua.

Kasama sa mga biga­ting bilyarista na may pag-asa pang makapasok sa finals sina WPA no. 1 Ek­lent Kasi ng Albania, WPA no. 2 Jung Lin Chang mula sa Tai­wan, 2015 at 2016 brides­maid na si Shane Van Boe­ning ng USA at Nether­lands gem Niels Feijen.