Ex-Sen. ‘Bong’ Revilla, kapag naabsuwelto, yari ang mga dilawan, he-he-he!
- BULGAR
- Dec 1, 2018
- 2 min read
SEN. ZUBIRI, NALUNGKOT SA PAGPATAY SA MAYAMAN, PERO ‘NGANGA’ SA MGA MARALITANG BIKTIMA NG EJK — Sobrang nalungkot si Sen. Migz Zubiri nang mabalitaang binaril at napatay sa loob ng SMBA ang milyunaryong negosyante na si Dominic Sytin, pero sa libu-libong maralitang biktima ng EJK (extrajudicial killings), “nganga” lang ang senador na ito.
Pagpapatunay ‘yan na magkaiba ang paningin sa mayaman at mahirap ng mga nagpapakilalang lingkod-bayan na tulad ni Sen. Zubiri, pwe!
◘◘◘
KAPAG NAABSUWELTO SI ‘BONG’ REVILLA, LAGOT ANG MGA ‘DILAWAN’—Kung pagbabasehan ang pag-amin ni state witness Benhur Luy na pineke lang niya ang pirma ni ex-Sen. ‘Bong’ Revilla at sa pag-amin ng dalawang testigong sina Merlina Sunas at Mary Arlene Baltazar na sinunod lang nila ang dikta ng prosecution panel laban sa ex-senator at hindi nila nakitang tumanggap ito ng pork barrel, malaki ang tsansa ni Revilla na maabsuwelto sa kaso ngayong Dec. 7, 2018.
Iyan ngayon ang ikinatatakot ng mga pulitikong “dilawan”, ang maabsuwelto si Revilla kasi bukod sa sure win na ito sa senatorial election, siguradong reresbak ito sa mga anomalya ng nakaraang Aquino gov’t. para ang mga taong nagpakulong sa kanya ng mahigit 4 taon ay sila naman ang makulong, abangan!
◘◘◘
CHIEF JUSTICE NA PABOR SA DEATH SQUAD — Pabor si newly appointed Chief Justice Lucas Bersamin sa itatatag na “death squad” ni P-Duterte kasi malaki raw ang tiwala niya sa gobyerno na ginagampanan nito ang tungkulin para labanan ang kriminalidad.
Ganu’n? Aba, labag sa batas ang death squad kasi ang sinumang nagkasala ay dapat dumaan sa paglilitis ng korte, sa rule of law at hindi dapat karakarakang likidahin ng death squad, tapos itong si Bersamin na Chief Justice pa ng bansa, pabor sa death squad ni P-Duterte.
Apat na araw pa lang sa puwesto si Bersamin bilang Chief Justice, napaghahalataan agad na “tuta” siya ni P-Duterte, boo!
◘◘◘
ANGELES CITY, MAY MONTE NA, MAY VIDEO KARERA PA — Bukod sa monte ni “Peping” ay nagkalat na rin daw ang mga salot na video karera ni “Paris” sa Angeles City.
Iyan ba ang sinasabi ni Mayor Ed Pamintuan na walang iligalista sa kanyang nasasakupan? Pwe!
Comments