Dahil sa non-stop rollback sa petrolyo; P8 pasahe, ibalik!
HIRAP na hirap na ang ilang mga magulang, empleyado at estudyante sa pagba-budget ng kanilang pera dahil sa sunud-sunod na pagtaas ng pamasahe.
‘Yung tipong kahit malapit lang ang pupuntahan nila ay P10 na agad ang dapat nilang bayaran, pahirap naman talaga para sa lahat!
Kasunod nito, bumaba na ang presyo ng langis at ayon kay Deputy Minority Leader Harlin Neil Abayon III, dapat nang ibalik ng Land Transportation Franchising and Regulatory Board (LTFRB) ang P8 singil sa pamasahe dahil nabawasan na ang presyo ng petrolyo sa kasalukuyan.
Gayundin, wala umanong economic at legal basis ang kasalukuyang public transport fares.
Ipinaalala rin ng kongresista sa LTFRB na sumunod sa parametric formula ni Transportation Sec. Arthur Tugade kung saan awtomatikong mababago ang PUV fares kapag nagkaroon ng fare adjustment sa presyo ng mga bilihin, langis at krudo sa merkado, lumalabas na kung nagbababa ang presyo ng petrolyo, gayundin dapat ang presyo ng pamasahe!
Kaya paalala para sa gobyerno, gumawa ng paraan upang masolusyunan ang problema ng bayan, hindi ‘yung kung anu-ano ang inuuna at binibigyang-pansin.
Samantala, ang panawagan para sa lahat habang hindi pa tinutugunan ng pamahalaan ang hiling ng karamihan, kumapit muna tayo sa hawakan ng jeepney nang sa gayun ay hindi tayo tuluyang maghirap at lumubog dahil sa patuloy na pagtaas ng pamasahe.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments