Search
  • Eddie M. Paez, Jr.

ORCULLO, INAASAHAN SA KAMPEONATO NG US 9-BALL


NAIWANANG naka­sampa sa mga balikat ng ba­tikang si Dennis “Ro­bocop” Orcullo ang pag-asa na isang Pinoy ang magkakampeon sa bispe­ras ng pagtatapos ng 2018 U.S. International Open 9-Ball sa Sheraton Waterfront Hotel ng Nor­folk, Virginia.

Ito ang lumutang pag­katapos na isa-isang mag-alsabalutan ang mga ka­ba­ba­yang sina World Pool Bil­liards Associa­tion (WPA) no. 2 Carlo “Black Tiger” Biado, Alex “The Lion” Pagulayan, Zorren James “Dodong Diamond” Aranas, War­ren “The Warrior” Kiam­co, Johann Chua at Eric Bay­hon dahil sa natik­mang tiga­lawang pagka­talo sa kom­petisyong tila World 9-Ball Cham­pionship ang kalibre sa tindi ng mga bilyaristang lumalahok mula sa iba’t-ibang parte ng daigdig.

Limang tagumpay na ang nairehistro ni Orcullo, ka­sa­lu­kuyang pangalawa sa AZBilliards money­board, sa paligsahan.

Dinaig niya sina J. Sheerman ng Amerika (11-1), Great Britain ace Chris Melling (11-10), Mika Im­monen ng Fin­land (11-2), local bet Os­car Dominguez (11-8) at ang ngayon ay ki­natawan na ng Canada na si Pa­gulayan (11-7) sa kompe­tisyong umakit ng 113 na mga cue artists.

Ang tanging talo ng Pi­noy ay ipinatikim ni Taiwa­nese Jung Lin Chang sa iskor na 8-11 pero dahil sa “double elimination” na tuntunin ng torneo, nananatiling bukas ang landas ni Or­cullo pa­punta sa cham­pion’s purse na $40,000.

Pero malaking sagabal sa kanyang pagla­lakbay si Eklent Kasi ng Al­bania na siyang susunod ni­yang makakaduwelo.

Si Kasi ang itinuturing ngayon na pinakamalupit na bilyarista sa buong mundo base sa listahan ng WPA.

Dalawang kinatawan ng Taiwan at tig-isa mula sa Estonia at Spain ang nana­natiling walang talo sa torneo kaya nasa win­ner’s bracket pa sila.

Bukod kina Orcullo at Kasi, mayroon pang apat na iba pang manlalaro sa one-loss side na may tsan­sa pang makuha ang kampeo­nato.

0 comments

Disclaimer : The views and opinions expressed on this website or any comments found on any articles herein, are those of the authors or columnists alike, and do not necessarily reflect nor represent the views and opinions of the owner, the company, the management and the website.

RECOMMENDED
BULGAR LOGO

Bulgar Online.

Call us : (02) 995-3732

© 2021 bulgaronline

Sison's Publishing House, Inc.