Permit muna bago carolling

TIMEOUT muna tayo sa usapang-politika.

Paparating na ang Pasko, tiyak excited na ang bagets at feeling bagets. Siyempre, hindi mawawala ang carolling para mas ramdam ang kapaskuhan.

Gayunman, sa Lungsod ng Baguio, hindi basta-basta makapagka-carolling ang isang indibidwal, grupo o organisasyon.

Ayon sa Social Welfare and Development Office, ipinagbabawal ang pagsasagawa ng carolling sa lungsod kung walang permit ang mga gagawa nito.

Kaya ang mga gustong magbahay-bahay para mamasko ay kailangan munang kumuha ng permit o pahintulot sa barangay kung sa isang barangay lamang sila mag-iikot.

Samantala, kung sa buong lungsod, kailangang humingi ng pahintulot sa kanilang tanggapan na pipirmahan ng alkalde.

At ang layunin nito ay upang maging legal umano ang pagka-carolling at hindi maituturing na pang-solicit ang gagawin ng mga ito.

Samantala, tiniyak ng ahensiya na mabibigyan umano ng tulong ang mga nais mag-carolling kung matutuklasan na sila ay tunay na nangangailangan.

Medyo kakaiba ang kautusang ito pero, umaasa tayo na hindi sana nito maapektuhan ang tunay na diwa ng pagka-carolling.

Hindi para makakolekta ng pera kundi upang makapaghatid ng katuwaan sa bawat pamilyang kinakatok at hinahandugan ng mga pamaskong awitin.