2 sumemplang sa motorsiklo

@Balitang Probinsiya | January 17, 2021

AKLAN—Dalawang lalaki ang sugatan nang sumemplang ang sinasakyan nilang motorsiklo kamakalawa sa Bgy. Andagao, Kalibo.

Kinilala ng pulisya ang mga biktima na sina Arjay Gonzales, 35-anyos at Janvee Alvios, 28-anyos, kapwa residente sa nasabing bayan.

Ayon sa ulat, habang minamaneho Gonzales ang motorsiklo at kaangkas si Alvios ay nakita nila ang mga nagpapatrulyang tauhan ng pulisya.

Dahil kapwa walang suot na face mask at oras na ng curfew dahil hatinggabi na ay umiwas sa mga awtoridad ang dalawa at mabilis na pinatakbo ang motorsiklo, pero sumemplang sila.

Ginagamot na ngayon sa ospital sina Gonzales at Alvios na kapwa sinampahan na rin ng mga kasong may kinalaman sa paglabag sa health protocol at curfew.