2 sugarol, binaril ng kapwa sugarol

@Balitang Probinsiya | ngayong Marso 6, 2024

AKLAN -- Dalawang sugarol ang sugatan nang barilin ng isang kapwa nila sugarol kamakalawa sa Brgy. Mobo, Kalibo sa lalawigang ito.

Ang dalawang biktima na kapwa nagtamo ng tig-isang tama ng bala sa katawan ay nakilalang sina Rufo Tayco, 44 at Jay Victoriano, 45, samantalang ang suspek ay si Louie Torre, nasa hustong gulang at pawang nakatira sa nasabing bayan.

Ayon sa ulat, habang nagsusugal ng “cara y cruz” sa nasabing lugar ay nagkaroon ng pagtatalo ang suspek at ang dalawang biktima.

Nabatid na habang nagtatalo ay binunot ni Torre ang kanyang baril at saka binaril ang dalawang biktima.

Agad namang nadakip ng mga nagrespondeng otoridad ang suspek na nahaharap ngayon sa kasong double frustrated murder at illegal possession of firearms and ammunitions.