2 kelot nadale sa rambol

@Balitang Probinsiya | September 9, 2023

ILOILO -- Dalawang lalaki ang nasa kritikal na kalagayan sa naganap na rambol ng mag-ama at magkaibigan kamakalawa sa Bgy. Agdahon, Passi City sa lalawigang ito.

Nakilala ang mga biktimang nagtamo ng tig-isang tama ng saksak sa katawan na sina Jimmy Pineda at Gabriel Barrera, kapwa 35-anyos at parehong nakatira sa nasabing barangay.

Ayon sa ulat, nagkaroon ng pagtatalo sina Pineda at ang nagtitinda ng barbecue na si Jayson Muyco, 22, hanggang magsuntukan ang dalawa na humantong sa pananaksak ng suspek sa biktima na tinamaan sa katawan.

Nabatid na tinangka pa ni Barrera na tulungan ang kaibigan na si Muyco, kahit may tama na ng saksak si Pineda kaya ang ginawa ng ama ng biktima na si Roberto Pineda, 64, ay sinaksak si Barrera sa katawan.

Dinala ng mga saksi sina Pineda at Barrera sa ospital, samantalang agad naaresto ng pulisya si Muyco habang pinaghahanap pa ng mga awtoridad ang tumakas na si Roberto.