2 HVT sa droga, nasakote

@Balitang Probinsiya | December 18, 2023

BACOLOD CITY -- Dalawang High-Value Target (HVT) sa droga ang inaresto sa operasyon ng mga otoridad kamakalawa sa Purok Sigay, Brgy. 2 sa lungsod na ito.

Ang mga suspek ay kinilala ng pulisya na sina Michael Tabara, 39 at estudyanteng itinago sa alyas na “Roman”, 18, kapwa nakatira sa naturang lungsod.

Nabatid na nadakip ang mga suspek sa isinagawang drug-bust operation ng mga operatiba sa nasabing lungsod.

Napag-alaman na nakakumpiska ang mga otoridad ng 232 gramo ng hinihinalang shabu at markadong pera sa pag-iingat ng mga suspek. 

Kusang sumama naman at hindi nanlaban ang mga suspek nang dakpin sila ng mga operatiba sa naturang lugar.