2 estudyante, ninakawan ng 2 cellphones

@Balitang Probinsiya | Pebrero 5, 2023

AKLAN —Dalawang estudyante ang ninakawan ng dalawang cellphones ng isang isnatser kamakalawa sa bayan ng Kalibo sa lalawigang ito.

Dahil kapwa menor-de-edad ay hindi na pinangalanan ng pulisya ang dalawang estudyanteng biktima na kapwa residente sa nasabing bayan.

Ayon sa ulat, habang nakatayo ang dalawang estudyante malapit sa isang sementeryo ay biglang sumulpot ang hindi kilalang isnatser at inagaw ang mga hawak nilang cellphones.

Agad humingi ng tulong sa pulisya ang dalawang biktima, at sa ngayon ay naglunsad na ng manhunt operations ang mga awtoridad para madakip ang isnatser.

Sinabi ng pulisya na may CCTV sa lugar at nakita dito ang mukha ng isnatser kaya't umaasa silang madali nilang matutunton ang kinaroroonan ng suspek.