19-anyos sinaksak ng senglot

@Balitang Probinsiya | March 27, 2023

ILOILO—Isang 19-anyos na binata ang sugatan nang saksakin ng isang lasing kamakalawa sa Bgy. Dela Paz, Banate sa lalawigang ito.

Kinilala ng pulisya ang biktimang nagtamo ng isang tama ng saksak sa katawan na si Jerome Gomez, samantalang ang suspek ay si Edwin Arante, nasa hustong gulang at kapwa residente sa nasabing barangay.

Ayon sa ulat, nang malasing ay naglakad sa kalsada si Arante at nang makasalubong si Gomez ay agad niya itong sinaksak sa hindi malamang dahilan.

Matapos ang pananaksak ay mabilis na tumakas ang suspek.

Ginagamot na sa ospital si Gomez, samantalang pinaghahanap na ngayon ng pulisya ang suspek para sampahan ng kasong frustrated murder.