16-anyos na dalagita, binugbog ng dyowa

@Balitang Probinsiya | October 08, 2023

AKLAN -- Isang 16-anyos na dalagita ang sugatan nang bugbugin ng kanyang nobyong 17-anyos kamakalawa sa bayan ng Makato sa lalawigang ito.

Dahil kapwa menor-de-edad, hindi na pinangalanan ng mga awtoridad ang biktima at ang suspek.

Ayon sa ulat, nagkaroon ng pagtatalo ang magkasintahan na humantong para bugbugin ng suspek ang biktima.

Nabatid na natigil lang ang pambubugbog nang umawat ang mga residente sa nasabing lugar.

Sa ngayon, ginagamot pa sa Aklan Provincial Hospital ang dalagita, samantalang inihahanda na ng mga awtoridad ang kasong serious physical injury sa binatilyong suspek.