Wanted sa Batangas, nasakote sa Camarines Norte

@Balitang Probinsiya | September 11, 2022

CAMARINES NORTE—Isang most wanted na rapist sa Batangas ang naaresto ng pulisya kamakalawa sa kanyang hideout sa Bgy. Magsaysay, Capalonga.

Hindi na muna pinangalanan ang suspek na nasa hustong gulang habang iniimbestigahan ito ng pulisya.

Napag-alamang dinakip ng pulisya ang suspek sa bisa ng warrant of arrest na inisyu ng korte kaugnay sa kinasasangkutan nitong kasong rape sa Tanauan City, Batangas.

Ayon sa ulat, may nagbigay-impormasyon sa pinagtataguan ng rapist, kaya agad rumesponde ang pulisya at dinakip ang suspek sa nasabing lugar.

Hindi naman nanlaban ang suspek at ngayon ay nakapiit na siya sa detention cell ng himpilan ng pulisya.