Talunang kandidato, huli sa mga boga at bala

@Balitang Probinsiya | July 5, 2022

MAGUINDANAO—Isang talunang kandidato ang dinakip ng mga awtoridad dahil sa pag-iingat ng mga baril at bala kamakalawa sa Bgy. Rumirimbang, Barira.

Ang suspek ay kinilala ng pulisya na si Usop Aron, nasa hustong gulang at talunang kandidato sa pagka-vice mayor sa nabanggit na bayan.

Nabatid na sinalakay ng pulisya ang bahay ni Aron sa bisa ng search warrant na inisyu ng korte at dito nakumpiska ang walong iba't ibang uri ng baril at mga bala.

Kusang sumama naman sa pulisya at hindi na nanlaban ang suspek nang dakpin siya ng mga awtoridad.

Nahaharap ngayon ang mga suspek sa kasong 8-counts ng illegal possession of firearms and ammunitions.