Senglot, tinodas ng karpintero

@Balitang Probinsiya | August 4, 2023

ILOILO -- Isang lasing ang namatay nang pagsasaksakin at tagain ng kapitbahay niyang karpintero kamakalawa sa Bgy. Lanag-Norte, Tubungan sa lalawigang ito.

Ang biktimang nagtamo ng mga tama ng saksak at taga sa katawan ay nakilalang si Patrick Casquite, 28, samantalang ang suspek ay si George Tacan, 49, kapwa nakatira sa nasabing barangay.

Ayon sa pulisya, habang nag-iinuman ay unang nalasing si Casquite at naging makulit umano ito hanggang magtalo sila ng kainumang si Tacan na humantong kaya kumuha ng itak ang suspek at pinagsasaksak at pinagtataga ang biktima.

Nabatid na dahil sa dami ng tinamong tama ng saksak sa katawan ay namatay ang biktima sa pinangyarihan ng krimen.

Agad namang nadakip ng mga rumespondeng tauhan ng pulisya ang suspek.