Sekyu tinodas ng kaalitan

@Balitang Probinsiya | July 25, 2023

BATANGAS — Isang security guard ang namatay nang pagbabarilin ng kanyang nakaalitan kamakalawa sa Bgy. Calayo, Nasugbu sa lalawigang ito.

Kinilala ang biktimang nagtamo ng mga tama ng bala sa katawan na si Carlo Lara, 35-anyos, security guard sa isang resort, samantalang ang suspek ay si Mervin Bautista, nasa hustong gulang, at parehong nakatira sa nasabing bayan.

Ayon sa ulat, habang nakaupo si Lara sa binabantayan niyang resort ay sumulpot ang suspek at agad pinagbabaril ang biktima.

Agad dinala ng mga saksi ang biktima sa ospital, pero idineklara itong dead-on-arrival.

Nagpalabas na ngayon ng manhunt operation ang pulisya para madakip ang suspek.