Paslit, patay sa bangga ng kotse

@Balitang Probinsiya | January 3, 2021

QUEZON—Isang 7-taong gulang na batang lalaki ang namatay nang aksidenteng mabangga ng kotse kamakalawa sa Bgy. Mason Norte, Candelaria.

Ang biktima ay nakilalang si John Rey Abu-Abu, residente ng nabanggit na barangay.

Ayon sa ulat, mabilis umano ang takbo ng kotse na minamaneho ni Kenneth Cala kaya nabangga ang biktima na tumatawid sa kalsada.

Nabatid na namatay sa mismong pinangyarihan ng aksidente ang biktima dahil sa tinamong malaking pinsala sa ulo.

Nakapiit na si Cala na nahaharap sa kasong reckless imprudence resulting to homicide.